Raavi-e-Hadees Abu Hurairah (RaziyAllaahu Anhu), Nabi (ﷺ) Ne Farmaaya -
"Sab Se Behtar Din Jis Mein Sooraj Nikla (Woh) Jumuah Ka Din Hai, Isi Din Aadam (Alaihissalaam) Paida Kiye Gaye, Isi Din Woh Jannat Mein Daakhil Kiye Gaye, Isi Din Woh Jannat Se (Zameen Par Utaarey Gaye) Is Din Mein Ek Ghadi (Waqt) Aisi Hai Ke Jisey Muslim Banda Namaaz Ki Haalat Mein Paaye Aur Allaah Se Us Mein Kuch Talab Kare Tou Allaah Usey Zaroor Ataa Farmaaega.
Abu Hurairah (RaziyAllaahu Anhu) Kehte Hain: Phir Mai Abdullaah Bin Salaam Se Milaa Aur Unse Is Hadees Ka Zikr Kiya Tou Unho Ne Kaha: Main Yeh Ghadi Achchi Tarah Jaanta Hoon. Main Ne Kaha: Mujhe Bhi Uske Baarey Mein Bataaiye Aur Is Silsiley Mein Mujhse Kuch Bukhl (Kanjoosi) Na Keejiye
Unho Ne Kaha: Yeh Asr Ke Ba'd Se Lekar Sooraj Doobney Ke Darmiyaan Hai, Is par Main (Abu Hurairah) Ne Kaha: Yeh Asr Ke Ba'd Kaise Hosakti Hai Jabke RasoolAllah ﷺ Ne Kaha: Isey Musalmaan Banda Haalat Namaaz Mein Paaye Aur Yeh Waqt Aisa Hai Jis Mein Namaaz Nahi Padhi Jaati ?
Tou Abdullaah Bin Salaam Ne Kaha: Kya RasoolAllah ﷺ Ne Yeh Nahi Farmaaya Hai Ke Jo Shakhs Namaaz Ke Intizaar Mein Kisi Jagah Baitha Rahey Tou Woh Bhi Namaz Hi Mein Hota Hai ?
Main (Abu Hurairah) Ne Kaha: Kyun Nahi Zaroor Farmaaya Hai. Tou Unho Ne Kaha: Tou Yahi Muraad Hai.
Jaami At-Tirmizee, Hadees (Saheeh) : 491 ; AL-Bukhaari : 935 ; Ibn Maajah : 1137
VAZAAHAT : Saheeh Muslim Mein Abu Moosa (RaziyAllaahu Anhu) Se Rivaayat Hai Ke, Nabi ﷺ Ne Farmaaya: "Yeh Ghadi Imaam Ke Mimbar Par Baithney Se Lekar Khutbey Se Faraaghat Ke Darmiyaan Hai."
Yeh Donon Ahaadees Saheeh Hai. Isliye Baqaul e Imaam Ahmad Aur Ibn Abdul Barr Donon Waqton Mein Duaa Ki Koshish Karni Chaahiye.
Yani khutbe ke duran imam ke baitne ke waqt aur asr ke baad se maghrib ke darmiyan tak, ye dono juma ke din dua qubool kiye jane ke auqat hain.
ﻭﺍﻟﻠﻪﷻ ﺃﻋﻠﻢ
copied
