Jaisa ke is ummat pe Allah ke beshumar fazal o karam hain un mai se ek fazal shab e qadar ka bhi hai. Shab e qadar ki sirf ek raat ki ibadat 1000 mahino ki nafil ibadat se behter hai. Jis ko is raat ke khair se mehroom kardiya gaya wo mehroom hai. Aur jisne is raat ko imaan ke sath ajr o sawab ki niyyat se ibadat kar ke paaliya us ke tamam pichle (saghira) gunah maaf hain aur sachche dil se toba kiye to kabira gunah bhi maaf hojate hain
in shaa Allah.
Garche Shab e qadar kisi ek raat mai hai lykin kis raat mai hoti hai Allah hi behter jaane is ko raaz mai rakhne mai Allah ki hikmate hain. Lihaza Nabi ﷺ ne shab e qadar ko ramazan ke aakhri ashre ki taaq (21,23,25,27,29) raato mai talash karne ka hukum diya hai.
Bukhari 2017
Doosri hadees mai Ammi aaisha (raziyallahu anha) farmati hain ke jab Ramzaan ke aakhri 10 din shuru hote to Rasoolullah ﷺ ibadat ke liye kamar-basta ho jate (kamar kas lete), raato ko jaagte aur apne ahl o ayaal ko bhi jagate.
Sunan Ibn Majah, Vol. 1, Book 7, Hadith 1768. sahih
Yani, Nabi ﷺ shab e qadar ki talash mai Ramazan ke aakhri 10 raate jaagte aur apne ghar walo ko bhi jagate. Lihaza shab e qadar ki talash mai paanch taaq raate jagna ya aakhri 10 raate jaagna dono jayaz hai agar koi taaq raate jaag ke shab e qadar talash karta hai to koi harj nahi.
Magar, Aakhri 10 raate jaagna ziyadah behter o afzal hai. Aur hamare mulko mai chand ki taariq ek din aage peeche hojati hai lihaza hamare liya 10 raate jagna behter hai. Agar waqai mai hum ek din aage ya peeche hain to das raate jagne se asal jo shab e qadar ki raat hai wo mil jati hai in shaa Allah.
ﻭﺍﻟﻠﻪﷻ ﺃﻋﻠﻢ
