1. Laylatul Qadr (Shab e qadr) ramazan ke aakhri paanch taaq rato mai ek raat hoti hai, lihaza in paanch taaq (21, 23, 25, 27, 29) rate ibadate karte huwe jag kar ek raat talash kiya jata hai aur aakhir das raate jagna bhi sabit hai...
Ammi aaisha (raziyallahu anha) farmati hain ke jab Ramzaan ke aakhri das (10) din shuru hote to Rasoolullah ﷺ ibadat ke liye kamar-basta ho jate (kamar kas lete), raato ko jaagte aur apne ahl o ayaal (ghar walo) ko bhi jagate.
Sunan Ibn Majah, Vol. 1, Book 7, Hadith 1768. sahih
2. Is raat ki talash mai das din o raat masjid mai I'tekaf baitna sunnat hai.
3. Magar in raato ki ibadate masjid mai karna zaruri nahi, ghar per nifili ibadate karne afzal hai.
4. Aur jaisa ke "raat" maghrib se hi shuru hojati hai, Maghrib ke baad se isha tak kasrat se nawafil padh sakte hain. Aur isha ke baad taraweeh padhlete hain to taraweeh ke baad bhi kasrat se nawafil padh sakte hain. Aur Allah ko mehboob wo namaz hai jis mai qiyam lamba ho. Lihaza qiyam mai kasrat se quran padhna afzal hai. Agar Quran ziyada yaad na ho to jo yaad hai usi ko repeat kar sakte hain aur chahe to namaz mai Qur'an hath mai pakde dekh kar bhi padh sakte hain.
5. Jis chiz ki bhi zarurat hai us ki dua kasrat se kar sakte hain arabi mai ho ya urdu ya aur koi zubaan mai. Aur in raato mai kasrat se darood bhi padh sakte hain aur in sob dua aur darood keliye haath uthana zaruri nahi chalte chalte baithe baithe bhi dua kar sakte hain.
"ALLAHUMMA INNI ASALUKAL AFIYA FIDDUNYA WAL AAKHIRA" kasrat se ye padhe sakte hain, ye dua dunya o aakhirat ki afiyat per mushtamil hai.
"ALLAHUMMA INNAKA AFUVUN TU HIBBUL AFFA FA'AFU ANNI". Ye dua apne gunaho ki mafi keliye kasrat se padh sakte hain.
6. Quran ki tilawat aur apni zuban mai tarjume bhi padhe taa ke malum ho bando keliye bando ke Rabb ne kya hukum diya hai, hadees bhi padh sakte hain deen ka ilm hasil karna bhi ibadat hai. Lykin lambe lambe waaz o nasihat mai hi raat ka taqriban hissa sarf karna durust nahi.
7. Kasrat se zikr o azkar bhi kar sakte hain. Jo azkar padh rahe ho us ka maana o matlab jan ke padhna ziyada behter hai.
8) Shab e qadr ki mazeed fazilat hasil karne keliye in das raato mai sadqa khairat bhi kasrat se kar sakte hain.
ﻭﺍﻟﻠﻪﷻ ﺃﻋﻠﻢ
