Yeh ghaib ki kuch baaten hain jo hum tumhen wahi kay zariye bata rahey hain . yeh baaten naa tum iss say pehlay jantay thay , naa tumhari qoam . lehaza sabar say kaam lo aur aakhri anjam muttaqiyo hi kay haq mein hoga .
Quran 11:49
aur qoam-e-aad ki taraf hum ney unn kay bhai Hood ko bheja . unhon ney kaha : aey meri qoam ! Allah ki ibadat kero . uss kay siwa tumhara koi mabood nahi . kiya phir bhi tum Allah say nahi daro gay ?
Qur'an 7:65
aey meri qoam ! mein tum say iss ( tableegh ) per koi ujrat nahi maangta . mera ajar kissi aur ney nahi , uss zaat ney apney zimmay liya hai jiss ney mujhay peda kiya hai . kiya phir bhi tum aqal say kaam nahi letay-?
Qur'an 11:51
kiya tum her oonchi jagah per koi yaad gaar bana ker fuzool harkaten kertay ho-?
Qur'an 26:128
aur tum ney bari karigari say banai hoi imaraten iss tarah rakh chorri hain jaisay tumhen hamesha zinda rehna hai ?
Qur'an 26:129
aey meri qoam ! apney perwerdigar say gunahon ki moaafi maango , phir uss ki taraf rujoo kero , woh tum per aasman say moosladhaar barishen barsaye ga , aur tumhari mojooda quooat mein mazeed quooat ka izafa keray ga , aur mujrim ban ker mun naa morro .
Qur'an 11:52
unhon ney kaha :
unn ki qoam kay sardar jinhon ney kufr apna rakha tha , kehney lagay : hum to yaqeeni tor per dekh rahey hain kay tum beywaqoofi mein mubtala ho , aur beyshak humara gumaan yeh hai kay tum aik jhootay aadmi ho
Qur'an 7:66
aey Hood ! tum humaray paas koi roshan daleel ley ker nahi aaye , aur hum apney khudaon ko sirf tumharay kehney say chorney walay nahi hain , aur naa hum tumhari baat per emaan laasaktay hain .
Qur'an 11:53
hum to iss kay siwa kuch aur nahi keh saktay kay humaray khudaon mein say kissi ney tumhen buri tarah jhapetay mein ley liya hai . Hood ney kaha : mein Allah ko gawah banata hun , aur tum bhi gawah raho kay tum Allah kay siwa jiss jiss ko uss ki khudai mein shareek mantay ho , mein uss say bari hun .
Qur'an 11:54
abb tum sabb kay sabb milker meray khilaf chaalen chal lo , aur mujhay zara mohlat naa do .
Qur'an 11:55
Hood ney kaha : aey meri qoam ! mujhay koi beywaqoofi laahaq nahi hoi , balkay mein Rabb-ul-Aalameen ki taraf say bheja huwa payghumber hun . .
Qur'an 7:67
bhala kiya tumhen iss baat per taajjub hai kay tumharay rab ki naseehat aik aesay aadmi kay zariye tum tak phonchi hai jo khud tum hi mein say hai , takay woh tumhen khabrdar keray-? aur woh waqt yaad kero jab uss ney nooh ( aleh-assalam ) ki qoam kay baad tumhen janasheen banaya , aur jism ki deel dol mein tumhen ( doosron say ) barha charha ker rakha . lehaza Allah ki naimaton per dhiyan do , takay tumhen falah naseeb ho .
Qur'an 7:69
unhon ney kaha : kiya tum humaray paas iss liye aaye ho kay hum tanha Allah ki ibadat keren , aur jinn ( button ) ki ibadat humaray baap dada kertay aaye hain , unhen chorr bethen-? acha agar tum sachay ho to ley aao humaray samney woh ( azab ) jiss ki hamen dhamki dey rahey ho !
Qur'an 7:70
Hood ney kaha : abb tumharay rab ki taraf say tum per azab aur qehar ka aana tey hochuka hai . kiya tum mujh say ( mukhtalif button kay ) unn naamon kay baaray mein jhagarrtay ho jo tum ney aur tumharay baap dadon ney rakh liye hain , jinn ki taeed mein Allah ney koi daleel nazil nahi ki-? bus to abb tum intizar kero , mein bhi tumharay sath intizar kerta hun
Qur'an 7:71
phir huwa yeh kay jab unhon ney uss ( azab ) ko aik badal ki shakal mein aata dekha jo unn ki wadiyon ka rukh ker raha tha to unhon ney kaha kay : yeh badal hai jo hum per barish barsaye ga . nahi ! balkay yeh woh cheez hai jiss ki tum ney jaldi machai thi aik aandhi jiss mein dardnak azab hai ,
Quran 46:24
jo apney perwerdigar kay hukum say her cheez ko tehas nehas ker daalay gi ! gharz unn ki halat yeh hogaee kay unn kay gharon kay siwa kuch nazar nahi aata tha . aesay mujrim logon ko hum aesi hi saza detay hain .
Qur'an 46:25
aur ( aey arab kay logo ! ) hum ney unn logon ko unn baaton ki taqat di thi jinn ki taqat tumhen nahi di , aur hum ney unn ko kaan , aankhen aur dil sabb kuch dey rakhay thay , lekin naa unn kay kaan aur unn ki aankhen unn kay kuch kaam ayen , aur naa unn kay dil , kiyonkay woh Allah ki aayaton ka inkar kertay thay , aur jiss cheez ka woh mazaq uraya kertay thay , ussi ney unhen aa-ghera .
Qur'an 46:26
hum ney aik musalsal nahoosat kay din mein unn per tez aandhi wali hawa chorr di thi ,
Qur'an 54:19
jo logon ko iss tarah ukhaar phenk deti thi jaisay woh khujoor kay ukhray huye darkht kay taney hon .
Qur'an 54:20
abb socho kay mera azab aur meri tanbeehaat kaisi then-?
Qur'an 54:21
aur hum ney aur bastiyon ko bhi halak kiya hai jo tumharay ird-gird waqay then , jabkay hum tarah tarah ki nishaniyan ( unn kay ) samney laa-chukay thay , takay woh baaz aajayen .
Qur'an 46:27
phir unhon ney Allah ka taqarrub hasil kernay kay liye jinn cheezon ko Allah kay siwa mabood bana rakha tha , unhon ney unn ki kiyon madad naa kerli-? iss kay bajaye woh sabb unn kay liye bey nishan hogaye . yeh to unn ka sarasar jhoot tha , aur bohtan tha jo unhon ney tarash rakha tha .
Qur'an 46:28
mein ney to Allah per bharosa ker rakha hai , jo mera bhi perwerdigar hai , aur tumhara bhi perwerdigar . zameen per chalney wala koi jandaar aisa nahi jiss ki choti uss kay qabazay mein naa ho . yaqeenan mera perwerdigar seedhay raastay per hai .
Qur'an 11:56
phir bhi agar tum mun morrtay ho , to jo paygham dey ker mujhay tumharay paas bheja gaya tha , mein ney woh tumhen phoncha diya hai . aur ( tumharay kufr ki wajeh say ) mera perwerdigar tumhari jagah kissi aur qoam ko yahan basa dey ga , aur tum uss ka kuch naa bigaar sako gay . beyshak mera perwerdigar her cheez ki nigrani kerta hai .
Quran 11:57
aur ( aakhir kaar ) jab humara hukum aagaya to hum ney apni rehmat kay zariye Hood ko aur jo log unn kay sath emaan laye thay , unn ko bacha liya , aur unhen aik sakht azab say nijat dey di .
Qur'an 11:58
yeh thay aad kay log jinhon ney apney perwerdigar ki nishaniyon ka inkar kiya , aur uss kay payghumberon ki nafarmani ki , aur her aesay shaks ka hukum maana jo perlay darjay ka jabir aur haq ka paka dushman tha !
Qur'an 11:59
aur ( iss ka nateeja yeh huwa kay ) iss duniya mein bhi phitkaar unn kay peechay laga di gaee , aur qayamat kay din bhi . yaad rakho kay qoam-e-aad ney apney rab kay sath kufr ka moamla kiya tha ! yaad rakho kay barbadi aad hi ki hoi , jo Hood ki qoam thi !
Qur'an 11:60
chunacheh hum ney kuch manhoos dino mein unn per aandhi ki shakal mein hawa bheji takay unhen dunyawi zindagi mein ruswai kay azab ka maza chakhayen . aur aakhirat ka azab uss say bhi ziyada ruswa kernay wala hai , aur unn ko koi madad moyassar nahi aaye gi .
Qur'an 41:16
chunacheh hum ney unn ko ( yani Hood aleh-assalam ko ) aur unn kay sathiyon ko apni rehmat kay zariye nijat di , aur unn logon ki jarr kaat daali jinhon ney humari nishaniyon ko jhutlaya tha , aur momin nahi huye thay .
Qur'an 7:72
 | Qaum-e-Aad){kind=link}